ইন্দো-পেছিফিক সামৰিক সম্পৰ্ক গভীৰ হোৱাৰ পাছত অষ্ট্ৰেলিয়াৰ সেনা প্ৰধান এই মাহত ভাৰত ভ্ৰমণ কৰিব

অষ্ট্ৰেলিয়াৰ সেনা প্ৰধান লেফটেনেণ্ট জেনেৰেল চাইমন ষ্টুৱাৰ্টে আগষ্ট ১০ৰ পৰা ১৪ তাৰিখলৈ ভাৰত ভ্ৰমণ কৰিব। এই সময়ছোৱাত তেওঁ ভাৰতীয় সেনা বাহিনীৰ প্ৰধান জেনেৰেল উপেন্দ্ৰ দ্বিবেদী আৰু ৰক্ষা মন্ত্ৰণালয়ৰ উচ্চ পদস্থ বিষয়াসকলৰ সৈতে গুৰুত্বপূর্ণ আলোচনা চলাব।

তেওঁৰ এই ভ্ৰমণটো ভাৰতৰ চীফ অৱ ডিফেন্স ষ্টাফৰ অষ্ট্ৰেলিয়া ভ্ৰমণৰ কেইমাহমান পিছতেই হ’ব, য’ত তেওঁ অষ্ট্ৰেলিয়াৰ ডিফেন্স ফৰ্চৰ চীফ এডমিৰেল ডেভিড জনষ্টনৰ লগতে বিভিন্ন উচ্চপদস্থ বিষয়াৰ সৈতে বৈঠক কৰিছিল। সেই বৈঠকসমূহত সামুদ্ৰিক সুৰক্ষা, যৌথ অনুশীলন, সক্ষমতা বৃদ্ধিৰ ব্যৱস্থা, প্ৰযুক্তি আদান-প্ৰদান আৰু নতুন দ্বিপাক্ষিক প্ৰচেষ্টাৰ ওপৰত গুৰুত্ব আৰোপ কৰা হৈছিল।

ভাৰত-অষ্ট্ৰেলিয়া সামৰিক সহযোগিতা দিনে দিনে অধিক ঘনিষ্ঠ হৈ উঠিছে। ২০২৩ চনৰ নৱেম্বৰ মাহত দিল্লীত অনুষ্ঠিত ২+২ মন্ত্ৰীস্তৰ বৈঠক আৰু ২০২৫ চনত অষ্ট্ৰেলিয়াত হ’বলগীয়া পৰৱৰ্তী বৈঠকে এই উচ্চ-স্তৰৰ নিয়মীয়া সংলাপৰ প্ৰমাণ দিয়ে। ২০২৩ চনৰ জুলাই মাহত অষ্ট্ৰেলিয়াত অনুষ্ঠিত ডিফেন্স পলিচি টক্‌ছত চলি থকা সহযোগিতা পৰ্যালোচনা কৰা হৈছিল আৰু নতুন যৌথ পদক্ষেপৰ ক্ষেত্ৰ চিহ্নিত কৰা হৈছিল।

AUSTRAHIND অনুশীলন, যি ২০১৬ চনত আৰম্ভ হৈছিল, ভাৰতীয় সেনা আৰু অষ্ট্ৰেলিয়াৰ ১ম ব্ৰিগেডৰ সৈতে যুগ্মভাৱে চলোৱা প্ৰধান অনুশীলন। এই অনুশীলনত কাউণ্টাৰ টেৰৰিজম, ক্লোজ-কোৱাটাৰ যুদ্ধ আৰু কৌশলগত অভিযানৰ ওপৰত গুৰুত্ব আৰোপ কৰা হয়। ইয়াৰ পৰৱৰ্তী সংস্কৰণ ২০২৫ চনৰ নৱেম্বৰত অষ্ট্ৰেলিয়াত হ’ব।

ভাৰতীয় সেনা Talisman Sabre নামৰ বহুজাতিক অনুশীলনতো সক্ৰিয়ভাৱে অংশ লৈছে। IPE-22 (Indo-Pacific Endeavour)-ত ভাৰতীয় সেনাই হুমানিটেৰিয়ান অ্যাণ্ড ডিজাষ্টাৰ ৰেছপ’ন্স (HADR), জংগল যুদ্ধ, আৰু সন্ত্রাসবাদ-বিৰোধী কৌশলৰ ওপৰত অষ্ট্ৰেলিয়াৰ সৈতে যৌথ আলোচনাত অংশ লৈছিল।

প্ৰশিক্ষণ আৰু একাডেমিক সহযোগিতাৰ ক্ষেত্ৰতো দুয়োখন দেশৰ সেনাই মিলি কাম কৰি আহিছে। ভাৰতীয় বিষয়া সকল অষ্ট্ৰেলিয়াৰ বিভিন্ন ডিফেন্স কোর্সত অংশ লৈছে, যেনে – অষ্ট্ৰেলিয়ান ডিফেন্স অ্যান্ড ষ্ট্ৰেটেজিক ষ্টাডিজ কোৰ্ছ, আৰ্মি কমাণ্ড এণ্ড ষ্টাফ কোৰ্ছ, ইত্যাদি। তাৰ বিপৰীতে, অষ্ট্ৰেলিয়াৰ বিষয়া সকল ভাৰতৰ NDC, DSSC, আৰু HDOC-ত অধ্যয়ন কৰিছে।

CIJW স্কুল, বৈৰেংতে অনুষ্ঠিত Instructor Exchange Programme-এ দুয়ো পক্ষৰ মাজত কৌশলগত আৰু প্ৰশিক্ষণগত গভীৰতা বৃদ্ধি কৰিছে। Subject Matter Expert Exchanges (SMEEs)-এ নীতিগত বুজাবুজি আৰু ইণ্টাৰঅপাৰেবিলিটিৰ ক্ষেত্ৰতো উন্নতি আনিছে।

Young Officers Exchange Programme, যাক পুঃ জেনেৰেল বিপিন ৰাৱটে পৰিকল্পনা কৰিছিল, ২০২২ চনত আৰম্ভ হৈছিল। এই কাৰ্যসূচীৰ অধীনত, দুয়ো দেশৰ যুৱ বিষয়া সকলে একেলগে প্ৰশিক্ষণ গ্ৰহণ কৰে আৰু একে পৰিৱেশত কাম কৰি অপাৰেচনেল পদ্ধতিৰ সৈতে পৰিচিত হয়।

২০১০ চনত আৰম্ভ হোৱা Army-to-Army Staff Talks এতিয়া বছৰি অনুষ্ঠিত হয়, যাৰ জৰিয়তে কৌশলগত আৰু আঞ্চলিক বিষয়বোৰৰ ওপৰত বিস্তৃত আলোচনা কৰা হয়।

ভাৰতীয় কোম্পানীসমূহে অষ্ট্ৰেলিয়ালৈ বিভিন্ন সামৰিক সামগ্ৰী ৰপ্তানি কৰিছে। ভাৰতৰ Army Design Bureau আৰু অষ্ট্ৰেলিয়াৰ Digger Worksৰ মাজত যুগ্মভাৱে যুদ্ধক্ষেত্ৰত ব্যৱহাৰযোগ্য কম-ব্যয়বহুল ব্যৱস্থা বিকাশৰ প্ৰচেষ্টা চলি আছে।

এই ভ্ৰমণত লেফটেনেণ্ট জেনেৰেল ষ্টুৱাৰ্টৰ অংশগ্ৰহণে ভাৰতীয় সেনাৰ ইণ্ডো-পেছিফিক অঞ্চলত এক বিশ্বাসযোগ্য অংশীদাৰ হিচাপে উত্থান আৰু পৰস্পৰৰ মাজত অপাৰেচনেল সমন্বয় আৰু কৌশলগত বিশ্বাসৰ ক্ষেত্ৰত আগবঢ়োৱা পদক্ষেপবোৰক অধিক দৃঢ় কৰি তুলিব।